إكس خبر- انا اليوم مواطن شيعي وبدي احكي بالعامية عن مشكلة كبيرة موجودة عنا الشيعة وهي “بلطجية شباب حركة أمل”.
يعني إنو بدي افهم شغلة.. ليش بكل لبنان التظاهرات بضلها سلمية وراقية وما بصير احتكاكات ومشاكل وزعرانات ومسلحين الا مطرح ما بكون في حركة أمل؟؟؟ اللي كان بالنبطية أو بمدينة صور، أو بالغبيري، أو وين ما كان؟؟ وقال شو؟ بيعترفو علناً انو شباب حركة امل قاموا بفتح الطريق بين بيروت والجنوب بالقوة بناء على طلب من رئيسهم نبيه بري بعد ما أغلقه “المشاغبين” برأيهن.
يا خيي أي مشاغبين؟ لك هول ثوار ضد الظلم، هول ثوار متل ملايين اللبنانيين اللي نزلوا بكل مناطق لبنان طلبا للعيش الكريم، لحقهن بالطبابة، بالضمان، بالشيخوخة، بفرص عمل. من اجل حقهن انو يقدروا يعبرو عن رأيهن بحرية وسلام من دون ما يتعرضلهن البلطجية المحسوبين عالزعما اللي خربو البلد، واللي نهبوه وصاروا من اصحاب المليارات.
ايه ضد البلطجية امثال بلطجية حركة أمل اللي وين في متظاهرين شيعة بهاجموهن، ع أساس الحركة هي الوجه المشرف للشيعة. هو يمكن حقهن هول الشباب “يتبلطجو” طالما حزب الله ما كان حاسم مع حركة أمل لا بل وفر لهم دائما الغطاء السياسي.
نحنا صحيح مندعم 100% حزب الله بالمقاومة، ولكن في ما خص القضايا الشيعية والوطنية يسمحلنا الحزب. حتى ولو كان الحزب ايدو نضيفة بس ما بجوز لا شرعا ولا دينا ولا وطنياً انو يغطي عالسرقة والنهب اللي بمارسوه كل حلفاءو بالسلطة ع حساب الشعب الفقير الجوعان، بدءاً من نبيه بري ونواب ووزراء حركة أمل وصولاً لجبران باسيل وامثالهن.
حتى لو كان حزب الله بيتمتع بقدرة تنظيمية مثالية في الداخل، ولا يُرى من شبابو الا التعامل المشرف مع باقي المواطنين، بس ما بجوز يكون هو الغطاء لزعرنات شباب حركة أمل ضد الشيعة وغير الشيعة سواء بالشياح او الغبيري أو بيروت او الجنوب حيث يتواجد المتظاهرين السلميين، وقبل التظاهرات اصلاً.
الناس محقونة كتير من تصرفات البلطجة تبع حركة امل، وغض حزب الله للبصر عنها.
https://www.youtube.com/watch?time_continue=99&v=IoLB0nJmOXg
ما في حزب الله اليوم يقول ما خصو بوضع البلد المنهار مثلا، وهو داخل الحكومة وبيعرف وشايف كل السرقات اللي بالملايين عم تصير قدامو حتى لو هو ما سرق.
اذا مش قادر يقول ومحروج كون هول الحرامية هني حلفاءو، يزيح عن السياسة ويخليها لغيرو.
ما في حزب الله يحكي عن صورة الشيعة المثقفة والواعية والمتعلمة (وللشهادة، أغلبية الطبقة الشيعية هيك) وبنفس الوقت منفلت زعران الشيعة ليشوهو صورة الشيعة بالزواريب والشوارع والإعلام والعاصمة والجنوب امام مرأى كل وسائل الاعلام.
يمكن حزب الله ما بيعرف بعد حجم السخط الشعبي (الشيعي والسني وحتى المسيحي) من أتباع حركة أمل اللي بيستعرضو عضلاتهن بكذا منطقة بلبنان، ومش هلق بوقت نحكي عن الخوات والسرقة والفضايح، لازم هو يكون ادرى فيها، بس نحنا بدنا انو الشيعي يكون مواطن لبناني قبل انتماءو الطائفي، ويتعاملو معو باقي اطياف الوطن ع هيدا الاساس، مش ع اساس هول بلطجية ومستقواين ولازم نزيح عنهن، ولا ع مبدأ القوي بياكل الضعيف داخل الطائفة الشيعية نفسها.
نشالله صوتي يوصل لقيادات حزب الله اللي صار لازم بقا يفكو قصة تلازمهم مع حركة امل وبلطجيتها (مع الاشارة انو في عنجد بالحركة ناس كتير اوادم ومنفتخر فيهن) وساعتها العالم رح تنحاز بأغلبيتها للحزب وبتعرف حركة امل ساعتها شو حجمها الحقيقي عالارض وبصير بالامكان تحجيم كل بلطجيتها، وسلاح المقاومة كل الشيعة رح يضلو معو سواء تحالف حزب الله مع حركة امل او لم يتحالف.
وبالنسبة للتظاهرات بشكل عام:
يعني اول شي الحركة بعتوا زعرانهم ليفزعوا الناس ويخربوا المظاهرة، الاشتراكية بعتوا شبابهن مع اعلامهم ع نص المظاهرة، الكتايب بعتوا نايب يتظاهر مع الناس، العونية نازلين شربحة وتهديد واستخفاف، القوات استقالوا قال هني يبا شرفا الوطن، والحزب اليوم باعت منشورات انو هيدي مؤامرة اسرائيلية لاسقاط الحزب!
يا حبيباتي ما هوي السيد بذات نفسو قال هيدي الثورة ما فيها اي تدخلات خارجية، واذا اساسا اسرائيل خصها بالموضوع كانوا هني شموا الريحة من زمان وما حدا كان بينزل من جماعة الحزب، وتاني شي بالنسبة لسلاح المقاومة، ما هوي لو نحنا قدرنا نحقق استقلالية وطنية حقيقية بلا فساد سياسي وسرقة واحتيال وصار جيشنا جيش للوطن بكل معنى الكلمة ومجهز ١٠٠٪ للتصدي للاعتداءات الخارجية ساعتها الحزب بذات نفسو بسلم سلاحو وبقلن خدو هالمسؤولية عني. وتالت شي كلكن نازلين ما حدا يدق بالسيد وما حدا يقرب صوبو، يا جماعة ما حدا ناكر فضل انو حما الحدود، بس كمان ما فينا نسكت عن سرقة نوابو. يعني حرامية بكل وقاحة!
اذا بيعرف وساكت النا حق نحاسبوه، واذا مش عارف اضغطوا عليه ليشيل هالنصابين اللي عندو ويجيب ناس متلكن عندها وطنية وكفاءة وباختصار نضيفة (طبعا هيدا على اعتبار انو مش رح فينا يكون عنا دولة علمانية فورا)، بس انو نجي نسقط الثورة لانو ما بدكن حدا يحكي عالسيد لا هيدي مش مقبولة. بالعكس ثوروا وخلوه يغيرن. لانو مبدأ الكرامة، مش انك تجي وتقول لانو قدم ابنو شهيد او لانو دافع عن ارضي بحق لحزبو ينهبني ويسرقني وبدو ياني ضل مطيع وقاعد ساكت انو حميتوني. كان احسن يجو داعش وموت اشرفلي! ا
